ຢາກຮຽນຕໍ່ຕ່າງປະເທດ ຕ້ອງກຽມຕົວແນວໃດ? ເຂົ້າໃຈງ່າຍໃນ 5 ນາທີ

ການໄດ້ໄປໃຊ້ຊີວິດ ແລະ ຮຽນຮູ້ຢູ່ຕ່າງປະເທດ ເປັນຄວາມຝັນຂອງຫຼາຍຄົນເລີຍເເມ່ນບໍ? ສຳລັບບາງຄົນ ການຮຽນຕໍ່ຕ່າງປະເທດບໍ່ໄດ້ເປັນພຽງເລື່ອງຂອງປະລິນຍາ ຫຼື ວຸດທິທີ່ໄດ້ຮັບ ແຕ່ເປັນໂອກາດໃນການເປີດໂລກ ເຫັນວິທີຄິດໃໝ່ໆ ພັດທະນາພາສາ ແລະ ໄດ້ລອງໃຊ້ຊີວິດດ້ວຍຕົນເອງໃນແບບທີ່ບໍ່ເຄີຍເຮັດມາກ່ອນ ໄປຈົນເຖິງການຫາໂອກາດໃນການຍ້າຍໄປຢູ່ໃນສັງຄົມໃໝ່ ປະເທດໃໝ່.

ເມື່ອຄິດຫາເລື່ອງການໄປຮຽນຕໍ່ຄ່າງປະເທດ ນັກຮຽນກໍຈະເລີ່ມມີຄວາມກັງວົນວ່າຄວນເລີ່ມຈາກໃສກ່ອນ ແລະ ຕ້ອງກຽມຕົວຫຍັງແດ່ ໃຊ້ເອກະສານຫຍັງໃນການສະໝັກ ແລະ ການຍື່ນວີຊາ ກັງວົນເລື່ອງຄ່າໃຊ້ຈ່າຍວ່າຈະຫຼາຍບໍ່ ແລ້ວຖ້າຍັງບໍ່ພ້ອມດ້ານພາສາຈະຍັງມີໂອກາດໄປຮຽນຕໍ່ຫຼືບໍ່? ຄວາມຮູ້ສຶກແບບນີ້ບໍ່ແປກເລີຍ ເພາະຂັ້ນຕອນການຮຽນຕໍ່ຕ່າງປະເທດມີລາຍລະອຽດຫຼາຍຢ່າງ ແລະ ຖ້າບໍ່ມີປະສົບການມາກ່ອນ ການກຽມຕົວກໍອາດເບິ່ງຊັບຊ້ອນພໍສົມຄວນ.

ສິ່ງສຳຄັນທີ່ສຸດທີ່ຢາກແນະນຳນ້ອງໆ ໄວ້ຕັ້ງແຕ່ຕົ້ນກໍຄື ການຮຽນຕໍ່ຕ່າງປະເທດບໍ່ແມ່ນເລື່ອງຂອງ “ຄົນເກ່ງຢ່າງດຽວ” ແຕ່ເປັນເລື່ອງຂອງ “ຄົນທີ່ວາງແຜນເປັນ” ຫຼາຍກວ່າ. ບົດຄວາມນີ້ ພວກ i-study ຢາກພາໄປສະຫຼຸບແບບ Step-by-Step ໃຫ້ຄົບຕັ້ງແຕ່ຈຸດເລີ່ມຕົ້ນໄປຈົນເຖິງຊ່ວງກ່ອນເດີນທາງ ເພື່ອໃຫ້ອ່ານຈົບແລ້ວເຫັນພາບທັນທີວ່າຕ້ອງເຮັດຫຍັງຕໍ່ ບໍ່ວ່ານ້ອງໆຈະຢູ່ໃນຊ່ວງເລີ່ມຫາຂໍ້ມູນ ຫຼື ກຳລັງຢູ່ໃນຊ່ວງຕັດສິນໃຈ.

ຮຽນຕໍ່ມະຫາວິທະຍາໄລຕ່າງປະເທດ ມີຂໍ້ດີແນວໃດ 

ກ່ອນທີ່ເຮົາຈະເລີ່ມລົງລາຍລະອຽດເລື່ອງການກຽມຕົວ ລອງມາທົບທວນກັນກ່ອນວ່າເປັນຫຍັງຫຼາຍຄົນຈຶ່ງຕັ້ງໃຈຢາກຮຽນຕໍ່ຕ່າງປະເທດ ເພາະເມື່ອເຮົາເຂົ້າໃຈເຫດຜົນຂອງຕົວເຮົາເອງຊັດຂຶ້ນ ການວາງແຜນກໍຈະມີຄວາມຊັດເຈນດ້ານຄວາມຕ້ອງການຂອງເຮົາຫຼາຍຂຶ້ນຕາມໄປດ້ວຍ.

• ຂໍ້ດີຢ່າງທຳອິດທີ່ໃຜໆກໍເວົ້າເຖິງຄື ພາສາອັງກິດທີ່ດີຂຶ້ນແບບກ້າວກະໂດດ. ການໃຊ້ຊີວິດໃນປະເທດທີ່ໃຊ້ພາສາອັງກິດເປັນພາສາຫຼັກນັ້ນຕ່າງຈາກການຮຽນໃນຫ້ອງຮຽນພຽງຢ່າງດຽວຢ່າງສິ້ນເຊີງ ເພາະເຮົາຕ້ອງສື່ສານທຸກວັນຕັ້ງແຕ່ສັ່ງອາຫານລົມກັບໝູ່ຮ່ວມຊັ້ນໄປຈົນເຖິງນຳສະເໜີວຽກໃນມະຫາວິທະຍາໄລ. ຜ່ານໄປໄລຍະໜຶ່ງກໍຈະຮູ້ສຶກໄດ້ເອງວ່າພາສາພັດທະນາຂຶ້ນຢ່າງເຫັນໄດ້ຊັດ.
• ນອກຈາກເລື່ອງພາສາແລ້ວ ຍັງມີ ວຸດທິການສຶກສາທີ່ໄດ້ຮັບການຍອມຮັບລະດັບສາກົນ. ປະລິນຍາຈາກມະຫາວິທະຍາໄລຊັ້ນນຳໃນອອສເຕຣເລຍ, ນິວຊີແລນ, ສະຫະລາຊະອານາຈັກ (UK), ການາດາ ຫຼື ສະຫະລັດອາເມຣິກາ ໄດ້ຮັບການຍອມຮັບຈາກນາຍຈ້າງທົ່ວໂລກ ແລະ ໃນຫຼາຍສາຍງານ ວຸດທິຈາກຕ່າງປະເທດຖືເປັນຂໍ້ໄດ້ປຽບທີ່ຊັດເຈນຫຼາຍ ມີໂອກາດໄດ້ເງິນເດືອນທີ່ສູງກວ່ານຳ.
• ອີກເລື່ອງທີ່ຫຼາຍຄົນໃຫ້ຄວາມສຳຄັນຄື ໂອກາດດ້ານອາຊີບ. ນາຍຈ້າງຍຸກນີ້ຊອກຫາຜູ້ສະໝັກທີ່ມີປະສົບການລະຫວ່າງປະເທດ ເພາະສະແດງໃຫ້ເຫັນເຖິງຄວາມກ້າທີ່ຈະປະເຊີນກັບຄວາມທ້າທາຍ ຄວາມສາມາດໃນການປັບຕົວ ແລະ ທັກສະການເຮັດວຽກຂ້າມວັດທະນະທຳ. ບາງຄົນຍັງໄດ້ຕໍ່ຍອດເປັນໂອກາດເຮັດວຽກໃນຕ່າງປະເທດຫຼັງຮຽນຈົບອີກດ້ວຍ ເພາະຕ່າງປະເທດຕ້ອງການຄົນທີ່ມີຄຸນນະພາບ ນັກສຶກສາທີ່ຮຽນຈົບຈະມີຄວາມຮູ້ທຽບເທົ່າກັບຄົນໃນປະເທດ ເຮັດໃຫ້ເປັນທີ່ຕ້ອງການຂອງບໍລິສັດຕ່າງໆ.
• ທີ່ສຳຄັນ ການໄດ້ໄປໃຊ້ຊີວິດດ້ວຍຕົນເອງຈະສອນ ເລື່ອງຄວາມຮັບຜິດຊອບ, ການຈັດການເວລາ ແລະ ການແກ້ໄຂບັນຫາສະເພາະໜ້າ. ຫຼາຍຄົນກັບມາພ້ອມກັບຄວາມໝັ້ນໃຈທີ່ເພີ່ມຂຶ້ນຢ່າງເຫັນໄດ້ຊັດ ເພາະການຮຽນຕໍ່ນອກບໍ່ໄດ້ປ່ຽນພຽງປະຫວັດການສຶກສາ ແຕ່ປ່ຽນວິທີຄິດ ແລະ ຄວາມໃຫຍ່ໂຕຂອງເຮົານຳອີກ.

ຮຽນຕໍ່ຕ່າງປະເທດຕ້ອງກຽມຕົວແນວໃດ? ສະຫຼຸບຄົບຈົບໃນບົດຄວາມດຽວ 

ພໍເວົ້າເຖິງຂັ້ນຕອນການຮຽນຕໍ່ຕ່າງປະເທດ ຫຼາຍຄົນມັກຄິດເຖິງເອກະສານ, ວີຊ່າ ຫຼື ມະຫາວິທະຍາໄລເປັນຢ່າງທຳອິດ ແຕ່ຄວາມຈິງແລ້ວ ຈຸດເລີ່ມຕົ້ນທີ່ສຳຄັນທີ່ສຸດຄືການວາງແຜນໃຫ້ຖືກລຳດັບ ເພາະຖ້າລຳດັບດີ ທຸກຢ່າງຫຼັງຈາກນັ້ນຈະງ່າຍຂຶ້ນຫຼາຍ ໂດຍສະເພາະຖ້າເຮົາເລີ່ມກຽມຕົວລ່ວງໜ້າຢ່າງໜ້ອຍ 6–12 ເດືອນ ກ່ອນວັນເດີນທາງ. 

1. ຄົ້ນຫາຄວາມມັກ ແລະ ຕັ້ງເປົ້າໝາຍຂອງຕົນເອງ 

ຂັ້ນຕອນທຳອິດຂອງການຮຽນຕໍ່ຕ່າງປະເທດບໍ່ແມ່ນການເລືອກປະເທດ ແຕ່ຄືການຖາມຕົນເອງໃຫ້ໝັ້ນໃຈກ່ອນວ່າ ເຮົາຢາກຮຽນຫຍັງ ແລະ ຢາກຮຽນໄປເພື່ອຫຍັງ.

ລອງເລີ່ມຈາກຄຳຖາມງ່າຍໆ ເຊັ່ນ:

• ຢາກຮຽນລະດັບໃດ ບໍ່ວ່າຈະເປັນປະລິນຍາຕີ, ໂທ, ເອກ, ລະດັບຊັ້ນສູງ ຫຼື ຫຼັກສູດພາສາອັງກິດ
• ຢາກຮຽນສາຍວິຊາເດີມທີ່ເຄີຍຮຽນ ຫຼື ຢາກປ່ຽນສາຍ
• ຫຼັງຮຽນຈົບແລ້ວຢາກເຮັດຫຍັງຕໍ່ — ກັບມາເຮັດວຽກຢູ່ລາວ ຫຼື ຢາກລອງເຮັດວຽກຕໍ່ຢູ່ນັ້ນກ່ອນ
• ມີງົບປະມານເທົ່າໃດ ແລະ ພ້ອມຈະໄປຕ່າງປະເທດເມື່ອໃດ

ຄຳຖາມເຫຼົ່ານີ້ສຳຄັນຫຼາຍ ບໍ່ວ່າຈະເປັນປະເທດທີ່ເໝາະ, ມະຫາວິທະຍາໄລທີ່ຄວນສະໝັກ, ງົບປະມານທີ່ຕ້ອງກຽມ ຫຼື ລວມທັງເອກະສານທີ່ຕ້ອງໃຊ້. ຖ້າເປົ້າໝາຍຍັງບໍ່ຊັດ ແຜນທັງໝົດກໍຈະມີຜົນໄປນຳ.

2. ເລືອກປະເທດ ແລະ ມະຫາວິທະຍາໄລທີ່ຕອບໂຈດ 

ເມື່ອຮູ້ເປົ້າໝາຍຂອງຕົນເອງແລ້ວ ຂັ້ນຕໍ່ໄປຄືການເລືອກປະເທດ ແລະ ມະຫາວິທະຍາໄລ ເຊິ່ງເປັນຊ່ວງທີ່ຫຼາຍຄົນຕື່ນເຕັ້ນທີ່ສຸດ ແຕ່ກໍສັບສົນທີ່ສຸດເຊັ່ນກັນ. ຄວາມຈິງຄື ບໍ່ມີປະເທດໃດດີທີ່ສຸດສຳລັບທຸກຄົນ ມີແຕ່ປະເທດທີ່ “ເໝາະ” ກັບເປົ້າໝາຍ, ງົບປະມານ ແລະ ການໃຊ້ຊີວິດຂອງແຕ່ລະຄົນເທົ່ານັ້ນ.

ລອງເບິ່ງຈຸດເດັ່ນຂອງປະເທດທີ່ນິຍົມ: 

• 🇦🇺 ອອສເຕຣເລຍ — ມີມະຫາວິທະຍາໄລຊັ້ນນຳລະດັບໂລກຮອດ 9 ແຫ່ງ ຈາກການຈັດອັນດັບ QS Top 100 ປີ 2026. ເປັນປະເທດທີ່ມີສະພາບແວດລ້ອມໜ້າຢູ່ ແລະ ປອດໄພ. ນັກສຶກສາຕ່າງຊາດສາມາດເຮັດວຽກເສິມ ໄດ້ 48 ຊົ່ວໂມງຕໍ່ 2 ອາທິດລະຫວ່າງເປີດພາກຮຽນ. ເໝາະສຳລັບຄົນທີ່ຢາກໄດ້ທັງຄຸນນະພາບການສຶກສາ ແລະ ຄຸນນະພາບຊີວິດ.
• 🇬🇧 ສະຫະລາຊະອານາຈັກ (UK) — ບ້ານຂອງມະຫາວິທະຍາໄລເກົ່າແກ່ ແລະ ມີຊື່ສຽງລະດັບໂລກຢ່າງ Oxford ແລະ Cambridge. ໄລຍະເວລາຮຽນປະລິນຍາຕີ ແລະ ໂທສັ້ນກວ່າຫຼາຍປະເທດ (ປ.ຕີ 3 ປີ ແລະ ປ.ໂທ 1 ປີ) ແລະ ວີຊານັກສຶກສາອະນຸຍາດໃຫ້ເຮັດວຽກໄດ້ 20 ຊົ່ວໂມງຕໍ່ອາທິດລະຫວ່າງເປີດພາກຮຽນ.
• 🇨🇦 ການາດາ — ຄ່າຄອງຊີບຖືກກວ່າສະຫະລັດອາເມຣິກາ. ສະພາບແວດລ້ອມທີ່ເປັນມິດກັບຄົນຕ່າງຊາດ ແລະ ຍັງມີໂອກາດຂໍ PR (Permanent Resident) ຫຼັງຮຽນຈົບສາມາດຂໍ Post-Graduation Work Permit (PGWP) ນຳອີກ. 
• 🇳🇿 ນິວຊີແລນ — ຜູ້ຄົນເປັນມິດ ແລະ ເວົ້າພາສາອັງກິດຟັງເຂົ້າໃຈງ່າຍ. ຄ່າຄອງຊີບຕ່ຳກວ່າອອສເຕຣເລຍ. ທຳມະຊາດສວຍງາມ. ສາມາດຂໍ PR ຫຼື Permanent Residence ຫຼັງຮຽນຈົບ ແລະ ເຮັດວຽກໃນນິວຊີແລນຕາມທີ່ກຳນົດ. ເໝາະກັບຄົນທີ່ມັກບັນຍາກາດສະຫງົບ.
• 🇸🇬 ສິງກະໂປ — ເປັນປະເທດໃກ້ໆລາວ ບິນພຽງ 3 ຊົ່ວໂມງ. ມີມະຫາວິທະຍາໄລຊັ້ນນຳຢ່າງ NUS ແລະ NTU ທີ່ຕິດອັນດັບ Top 20 ຂອງໂລກ ແລະ ມະຫາວິທະຍາໄລຕ່າງຊາດທີ່ສາມາດຮຽນ ປ.ຕີ ຈົບພາຍໃນ 2 ປີ ແລະ ປ.ໂທ ຈົບພາຍໃນ 1 ປີ ພ້ອມສາມາດເຮັດວຽກຕໍ່ໃນສິງກະໂປ. ເໝາະກັບຄົນທີ່ຢາກໄດ້ຄຸນນະພາບສູງໂດຍບໍ່ຕ້ອງການໄປໄກ.

ນອກຈາກຊື່ສຽງຂອງມະຫາວິທະຍາໄລແລ້ວ ຕ້ອງຄຳນຶງເຖິງສະພາບແວດລ້ອມຂອງເມືອງທີ່ຈະໄປຢູ່ນຳ ເພາະການຮຽນຕໍ່ນອກບໍ່ໄດ້ມີພຽງໃນຫ້ອງຮຽນ ແຕ່ຄືການໃຊ້ຊີວິດທຸກມື້ ຄ້າຍກັບການຍ້າຍເຮືອນ ເຊິ່ງສະພາບອາກາດ, ວັດທະນະທຳ, ຄວາມປອດໄພ ແລະ ໂອກາດໃນການເຮັດວຽກຫຼັງຮຽນຈົບ ລ້ວນສົ່ງຜົນຕໍ່ຄວາມສຸກໃນການໃຊ້ຊີວິດຫຼາຍກວ່າທີ່ຄິດ.

3. ວາງແຜນງົບປະມານ ແລະ ຄ່າໃຊ້ຈ່າຍ 

ໜຶ່ງເລື່ອງທີ່ທຸກຄົນຕ້ອງໄດ້ພົບຢ່າງແນ່ນອນຄືການວາງແຜນເລື່ອງເງິນເຮົາຄວນວາງແຜນເລື່ອງງົບປະມານໃຫ້ຊັດເຈນຕັ້ງແຕ່ຕົ້ນ.

ຂໍ້ຜິດພາດທີ່ມັກພົບເລື້ອຍໆຄືການເບິ່ງພຽງແຕ່ຄ່າເທິມ ແລ້ວລືມຄິດຄ່າໃຊ້ຈ່າຍຮຽນຕໍ່ຕ່າງປະເທດໃນສ່ວນອື່ນໆ ທັງທີ່ຄວາມຈິງແລ້ວມີຫຼາຍສ່ວນຫຼາຍ ລອງມາຄຳນວນເບິ່ງຕົວເລກຈິງນຳກັນ.

ຄ່າຮຽນ (Tuition Fee) ໂດຍປະມານຕໍ່ປີ: 

ອອສເຕຣເລຍ: AUD 20,000–45,000 (ປະມານ 13,888–31,250 USD)

ສະຫະລາຊະອານາຈັກ: GBP 12,000–30,000 ຕໍ່ປີ

ການາດາ: CAD 20,000–40,000 ຕໍ່ປີ

ຄ່າຄອງຊີບຕໍ່ເດືອນ

ພວກເຮົາຂໍແນະນຳແບບຄ່າວໆວ່າຄ່າຄອງຊີບໂດຍລວມຈະຢູ່ທີ່ປະມານ 27,780–34,720 USD ຕໍ່ເດືອນ ຖ້າເລືອກອອສເຕຣເລຍ ຊິດນີຈະເລີ່ມທີ່ AUD 1,388, ເມວເບີນ AUD 1,320 ແລະ ບຣິສເບນ AUD 1,041 ຕໍ່ເດືອນ. ສ່ວນສິງກະໂປຈະເລີ່ມທີ່ປະມານ SGD 1,500 ຕໍ່ເດືອນ. 

ອີກເລື່ອງທີ່ຫຼາຍຄົນມັກຈະບໍ່ແນ່ໃຈວ່າຕ້ອງກຽມແນວໃດ ຄື ເອກະສານຮັບຮອງທາງການເງິນ (Bank Statement) ເພາະຫຼາຍປະເທດກຳນົດໃຫ້ສະແດງຫຼັກຖານວ່າມີເງິນພຽງພໍຕະຫຼອດໄລຍະເວລາການສຶກສາຕອນຍື່ນວີຊານັກສຶກສາ ເຊັ່ນ:

• ອອສເຕຣເລຍກຳນົດຂັ້ນຕ່ຳ AUD 2,500 ຕໍ່ເດືອນ ຫຼື ປະມານ 22,636 USDຕໍ່ປີ
• ນິວຊີແລນກຳນົດໄວ້ທີ່ 12.000 USDຕໍ່ປີ
• ສິງກະໂປບໍ່ມີການຂໍ Bank Statement

ດັ່ງນັ້ນ ການວາງແຜນຄ່າໃຊ້ຈ່າຍຮຽນຕໍ່ຕ່າງປະເທດ ບໍ່ໄດ້ເປັນພຽງເພື່ອໃຫ້ມີເງິນພໍໃຊ້ ແຕ່ຍັງກ່ຽວຂ້ອງກັບຄວາມພ້ອມຂອງເອກະສານນຳອີກ.

ຢ່າລືມຫາຂໍ້ມູນທຶນການສຶກສາຄຽງຄູ່ກັນໄປນຳ ບໍ່ວ່າຈະເປັນທຶນຈາກລັດຖະບານ, ສະຖາບັນການສຶກສາ ຫຼື ອົງກອນຕ່າງໆ ເຊັ່ນ ທຶນ Endeavour ຂອງອອສເຕຣເລຍ ຫຼື Chevening ຂອງສະຫະລາຊະອານາຈັກ. ທຶນບາງໂຄງການຄອບຄຸມທັງຄ່າຮຽນ ແລະ ຄ່າຄອງຊີບ ໂດຍທຶນຂອງມະຫາວິທະຍາໄລ ມັກຄອບຄຸມ 10-50% ເຊິ່ງຊ່ວຍຫຸຼດພາລະໄດ້ຫຼາຍ.

4.ກຽມຄວາມພ້ອມດ້ານພາສາອັງກິດ 

ເລື່ອງພາສາຄືອີກດ່ານສຳຄັນຂອງການຮຽນຕໍ່ຕ່າງປະເທດ ແລະ ເປັນເລື່ອງທີ່ບໍ່ຄວນລໍຈົນໃກ້ deadline ແລ້ວຄ່ອຍເລີ່ມ ເພາະຍິ່ງກຽມໄວ ຍິ່ງມີທາງເລືອກຫຼາຍຂຶ້ນ.

ການເສັງວັດລະດັບພາສາທີ່ນິຍົມທີ່ສຸດມີສອງແບບຫຼັກໆ ຄື:

• IELTS (International English Language Testing System) ເຊິ່ງໄດ້ຮັບການຍອມຮັບຢ່າງກວ້າງຂວາງ ໂດຍສະເພາະໃນອອສເຕຣເລຍ, ສະຫະລາຊະອານາຈັກ, ນິວຊີແລນ ແລະ ການາດາ
• TOEFL iBT ທີ່ນິຍົມຫຼາຍໃນສະຫະລັດອາເມຣິກາ ແລະ ການາດາ

ຄະແນນຂັ້ນຕ່ຳທີ່ມະຫາວິທະຍາໄລສ່ວນຫຼາຍຕ້ອງການສຳລັບ IELTS:

• ລະດັບປະລິນຍາຕີ: 6.0–6.5
• ລະດັບປະລິນຍາໂທ: 6.5–7.0
• ສະຖາບັນຊັ້ນນຳຢ່າງກຸ່ມ Group of Eight ໃນອອສເຕຣເລຍ ອາດຕ້ອງການເຖິງ 7.0–7.5

ສຳລັບ TOEFL ຄະແນນຂັ້ນຕ່ຳທີ່ມັກກຳນົດຢູ່ທີ່ປະມານ 80–100 ຄະແນນ ຈາກຄະແນນເຕັມ 120.

ຫຼາຍຄົນມັກຄິດວ່າ ໃກ້ໆມື້ເສັງຄ່ອຍກຽມອ່ານບົດຮຽນກໍ່ໄດ້. ການສອບ IELTS ບໍ່ໄດ້ມີພຽງວັນສອບວັນດຽວ ຍັງມີຊ່ວງຝຶກທຳໂຈດ, ຝຶກຂຽນ, ຝຶກ Speaking, ການຈອງຮອບສອບ ແລະ ການລໍຜົນສອບນຳອີກ. ຖ້າຄະແນນຮອບທຳອິດຍັງບໍ່ຮອດ ກໍຕ້ອງກຽມເວລາສຳລັບການເສັງຮອບໃຫມ່ນຳ. ແນະນຳໃຫ້ເລີ່ມກຽມຕົວລ່ວງໜ້າຢ່າງໜ້ອຍ 3–6 ເດືອນກ່ອນສອບເສັງ IELTS ຈິງ.

ຖ້າຍັງບໍ່ໝັ້ນໃຈເລື່ອງພາສາ ບໍ່ໄດ້ໝາຍຄວາມວ່າໝົດສິດໄດ້ຮຽນຕໍ່ນອກ ເພາະບາງມະຫາວິທະຍາໄລມີຫຼັກສູດ Pathway Program ຫຼື Pre-sessional English ທີ່ຊ່ວຍໃຫ້ນັກສຶກສາສາມາດຮຽນພາສາຢູ່ທີ່ມະຫາວິທະຍາໄລນັ້ນກ່ອນ ແລ້ວຄ່ອຍຍ້ອງຂຶ້ນຮຽນຫຼັກສູດຫຼັກໄດ້ ໂດຍບໍ່ຕ້ອງຍື່ນ IELTS ໃໝ່ອີກຄັ້ງ.

5. ຈັດກຽມເອກະສານສຳຄັນສຳລັບການສະໝັກຮຽນ 

ອີກໜຶ່ງສ່ວນຂອງຂັ້ນຕອນການຮຽນຕໍ່ຕ່າງປະເທດທີ່ຕ້ອງໃຊ້ຄວາມລະອຽດຫຼາຍຄືເລື່ອງເອກະສານ ເພາະຕໍ່ໃຫ້ໂປຣໄຟລ໌ດີສໍ່າໃດ ຖ້າເອກະສານບໍ່ຄົບ ຫຼື ບໍ່ຕົງເງື່ອນໄຂ ກໍມີໂອກາດພາດໄດ້ເຊັ່ນກັນ.

ໃບລາຍງານຜົນການສຶກສາ (Academic Transcript) ຕ້ອງເປັນສະບັບພາສາອັງກິດ ແລະ ມີກາຈ້ຳປະທັບຈາກສະຖານສຶກສາ (Official Sealed Transcript). ຄວນຂໍລ່ວງໜ້າຫຼາຍອາທິດ ເພາະບາງບ່ອນໃຊ້ເວລາດົນຫຼາຍ. 

Statement of Purpose (SOP) ຫຼື ຈົດໝາຍແນະນຳຕົວ ຄືໜຶ່ງໃນເອກະສານທີ່ສຳຄັນທີ່ສຸດ ແລະ ເປັນໂອກາດທີ່ເຮົາຈະເລົ່າໃຫ້ມະຫາວິທະຍາໄລຮູ້ວ່າເຮົາເປັນໃຜ, ເປັນຫຍັງຈຶ່ງເລືອກຫຼັກສູດນີ້, ເປົ້າໝາຍໃນອະນາຄົດຄືຫຍັງ ແລະ ຈະນຳສິ່ງທີ່ຮຽນໄປຕໍ່ຍອດແນວໃດ. SOP ທີ່ດີບໍ່ຈຳເປັນຕ້ອງໃຊ້ພາສາຍາກ ແຕ່ຕ້ອງຊັດ ແລະ ຈິງໃຈ.

Letter of Recommendation (LOR) ຫຼື ຈົດໝາຍຮັບຮອງ ໂດຍທົ່ວໄປຕ້ອງການ 2–3 ສະບັບ ຈາກອາຈານ ຫຼື ຜູ້ບັງຄັບບັນຊາທີ່ຮູ້ຈັກເຮົາດີ. ຄວນຕິດຕໍ່ລ່ວງໜ້າຢ່າງໜ້ອຍ 1–2 ເດືອນ ເພື່ອໃຫ້ພວກເຂົາມີເວລາຂຽນຢ່າງລະອຽດ.

ນອກຈາກນີ້ ຍັງມີເອກະສານອື່ນໆ ທີ່ອາດຕ້ອງໃຊ້ຕາມສາຍວິຊາ ຫຼື ລະດັບການສຶກສາເຊັ່ນ ໃບປະລິນຍາ, Portfolio ສຳລັບສາຍສ້າງສັນ, ຜົນສອບ GMAT/GRE ສຳລັບບາງຫຼັກສູດລະດັບບັນດິດສຶກສາ ຫຼື ຫຼັກຖານການເຮັດວຽກສຳລັບຫຼັກສູດ MBA ບາງແຫ່ງ.

6. ຂັ້ນຕອນການຍື່ນຂໍວີຊານັກສຶກສາ ແລະ ການກວດສຸຂະພາບ 

ຫຼັງຈາກໄດ້ຮັບ Offer Letter ຈາກມະຫາວິທະຍາໄລແລ້ວ ຫຼາຍຄົນຮູ້ສຶກໂລ່ງໃຈ ແຕ່ຄວາມຈິງແລ້ວ ເລື່ອງວີຊານັກສຶກສາ ເປັນອີກຂັ້ນທີ່ຕ້ອງໃຊ້ຄວາມລະອຽດພໍສົມຄວນ ເພາະແຕ່ລະປະເທດມີຊື່ເອີ້ນ ແລະ ຂັ້ນຕອນທີ່ຕ່າງກັນ ເຊັ່ນ ອອສເຕຣເລຍໃຊ້ Student Visa (Subclass 500) ສ່ວນສະຫະລາຊະອານາຈັກເອີ້ນວ່າ Student Visa.

ໂດຍທົ່ວໄປ ເອກະສານທີ່ມັກຕ້ອງໃຊ້ໃນການຍື່ນວີຊານັກສຶກສາ ໄດ້ແກ່:

• Offer Letter ຫຼື Confirmation of Enrolment (CoE) ຈາກມະຫາວິທະຍາໄລ
• ໜັງສືຜ່ານແດນທີ່ມີອາຍຸໃຊ້ງານພຽງພໍ
• ຫຼັກຖານທາງການເງິນ
• ຜົນການກວດສຸຂະພາບ ແລະ ຜົນການກວດເຊື້ອວັນໂຣກ (ສຳລັບບາງປະເທດ)
• ຫຼັກຖານທີ່ພັກ
• ການຊື້ປະກັນສຸຂະພາບໃຫ້ຄອບຄຸມໄລຍະເວລາການຮຽນທັງໝົດ ເຊັ່ນ OSHC ສຳລັບອອສເຕຣເລຍ

ສິ່ງທີ່ຕ້ອງລະວັງເປັນພິເສດຄື ຢ່າໃຊ້ຂໍ້ມູນເກົ່າ ຫຼື ຂໍ້ມູນທີ່ບອກເລົ່າຕໍ່ໆກັນມາຢ່າງດຽວ ເພາະກົດຂອງວີຊານັກສຶກສາສາມາດປ່ຽນແປງໄດ້ຕະຫຼອດເວລາ ຄວນກວດສອບຈາກເວັບໄຊທ໌ທາງການຂອງປະເທດປາຍທາງ ຫຼື ໃຫ້ຜູ້ຊ່ຽວຊານ ຫຼື ທີມ i-study ຊ່ວຍກວດເອກະສານ ລວມທັງການກວດຄືນ GS / SOP ເພື່ອຄວາມໝັ້ນໃຈ. ພວກອ້າຍເອື້ອຍຈະຊ່ວຍໃນການຕື່ມຂໍ້ມູນ ແລະ ກຽມເອກະສານໃນຖານະຕົວແທນມະຫາວິທະຍາໄລ. ການຕື່ມຂໍ້ມູນຜິດ ຫຼື ເອກະສານບໍ່ຄົບ ອາດເຮັດໃຫ້ວີຊາຖືກປະຕິເສດ ແລະ ຖ້າຖືກປະຕິເສດໄປແລ້ວ ຈະຍິ່ງສົ່ງຜົນຕໍ່ການຍື່ນຄັ້ງຕໍ່ໄປນຳ.

ສຳລັບປະເທດທີ່ສະຖານທູດມີການເອີ້ນໄປສຳພາດ ເຊັ່ນ ສະຫະລັດອາເມຣິກາ ສິ່ງທີ່ເຈົ້າໜ້າທີ່ຢາກເຫັນ ຫຼື ຢາກຟັງ ບໍ່ແມ່ນຄຳຕອບທີ່ທ່ອງຈຳ ແຕ່ຄືຄວາມສົມເຫດສົມຜົນຂອງແຜນທັງໝົດ ທັງເຫດຜົນໃນການໄປຮຽນ, ແຜນການເງິນ ແລະ ເປົ້າໝາຍຫຼັງຮຽນຈົບ.

7.ການຫາທີ່ພັກ ແລະ ກຽມຕົວກ່ອນເດີນທາງ (Pre-Departure) 

ເມື່ອການກຽມເລື່ອງການຮຽນ ແລະ ວີຊານັກສຶກສາ ເລີ່ມເຂົ້າທີ່ແລ້ວ ຢ່າລືມວ່າຊ່ວງກ່ອນເດີນທາງ ກໍສຳຄັນຫຼາຍເຊັ່ນກັນ ເພາະນີ້ຄືຊ່ວງທີ່ເຮັດໃຫ້ການເລີ່ມຕົ້ນຊີວິດໃໝ່ລາບລື່ນ ຫຼື ຕິດຂັດໄດ້ເລີຍ.

ເລື່ອງທີ່ພັກມີຕົວເລືອກຫຼັກໆ ໃຫ້ເລືອກ:

• ຫໍພັກໃນມະຫາວິທະຍາໄລ (On-Campus) ທີ່ສະດວກ, ໃກ້ຫ້ອງຮຽນ, ເໝາະກັບປີທຳອິດ ເພາະມີໂອກາດຮູ້ຈັກໝູ່ໃໝ່ຫຼາຍ ແຕ່ຕ້ອງສະໝັກລ່ວງໜ້າ ເພາະທີ່ນັ່ງຈຳກັດ
• ຫໍພັກເອກະຊົນນອກມະຫາວິທະຍາໄລ (Off-Campus) ທີ່ມີຄວາມຍືດຫຍຸ່ນຫຼາຍກວ່າ
• Homestay ທີ່ເໝາະກັບຄົນທີ່ຢາກຝຶກພາສາ ແລະ ຮຽນຮູ້ວັດທະນະທຳທ້ອງຖິ່ນໄປພ້ອມກັນ
• Share House ທີ່ຊ່ວຍປະຢັດຄ່າໃຊ້ຈ່າຍ ສຳລັບນັກສຶກສາທີ່ມີແຜນຢູ່ໄລຍະຍາວ

ສ່ວນເລື່ອງການກຽມຕົວກ່ອນເດີນທາງ ສິ່ງທີ່ບໍ່ຄວນເບິ່ງຂ້າມ ໄດ້ແກ່:

• ການເປີດບັນຊີທະນາຄານໃນປະເທດປາຍທາງ (ບາງແຫ່ງສາມາດເຮັດອອນລາຍລ່ວງໜ້າໄດ້)
• ການສະໝັກຊິມໂທລະສັບທ້ອງຖິ່ນ
• ການແຈ້ງທະນາຄານຢູ່ລາວ ຫຼື ໄທວ່າຈະໃຊ້ບັດໃນຕ່າງປະເທດ
• ການສຶກສາວັດທະນະທຳ ແລະ ມາລະຍາດພື້ນຖານຂອງປະເທດນັ້ນໆໄວ້ນຳ

ອີກເລື່ອງທີ່ຢາກຝາກໄວ້ຄືເລື່ອງການກຽມໃຈນຳ. ການຮຽນຕໍ່ຕ່າງປະເທດບໍ່ໄດ້ມີພຽງພາບສວຍງາມທີ່ເຫັນໃນໂລກອອນໄລ ຊ່ວງທຳອິດ ຫຼາຍຄົນຕ້ອງປັບຕົວກັບພາສາ, ວັດທະນະທຳ, ວິທີຮຽນ ແລະ ຄວາມຄິດຮອດເຮືອນ. ການກຽມໃຈໄວ້ຕັ້ງແຕ່ກ່ອນເດີນທາງຈະຊ່ວຍໃຫ້ຮັບມືໄດ້ດີຂຶ້ນຫຼາຍ.

ຢາກຮຽນຕໍ່ຕ່າງປະເທດ ໃຫ້ i-study ຊ່ວຍດູແລທຸກຂັ້ນຕອນ 

ຖ້ານ້ອງໆ ອ່ານມາເຖິງຕອນນີ້ ຈະເຫັນເລີຍວ່າການຮຽນຕໍ່ຕ່າງປະເທດ ມີຫຼາຍຢ່າງທີ່ຕ້ອງໄດ້ກຽມໂຕ ຕັ້ງແຕ່ການຕັ້ງເປົ້າໝາຍ, ເລືອກປະເທດ, ວາງງົບ, ກຽມພາສາ, ກຽມເອກະສານ ໄປຈົນເຖິງເລື່ອງວີຊານັກສຶກສາ ແລະ ການຈັດການກ່ອນເດີນທາງ.

ສຳລັບນ້ອງໆ ບາງຄົນອາດມັກເຮັດເອງທຸກຂັ້ນຕອນ ເຊິ່ງກໍເຮັດໄດ້ ແຕ່ກໍຕ້ອງຮັບຮູ້ວ່າຂັ້ນຕອນການຮຽນຕໍ່ຕ່າງປະເທດ ມີລາຍລະອຽດຫຼາຍ ແລະ ບາງເລື່ອງຕ້ອງອາໄສປະສົບການ ໃນການຊ່ວຍເບິ່ງວ່າຫຍັງຄວນເລີ່ມກ່ອນ, ຫຍັງສ່ຽງພາດ, ຫຍັງຄວນກຽມໄວ້.

ສຳລັບການຈັດການເລື່ອງເອກະສານຕ່າງໆ ໃຫ້ທີມ i-study (www.i-study.co) ເຂົ້າມາຊ່ວຍໄດ້. ທີມງານພ້ອມໃຫ້ຄຳປຶກສາ ແລະ ດູແລທຸກຂັ້ນຕອນການຮຽນຕໍ່ຕ່າງປະເທດຢ່າງຄົບວົງຈອນ ຕັ້ງແຕ່ໃຫ້ຄຳປຶກສາຟຣີ ແລະ ຊ່ວຍວິເຄາະຄວາມຕ້ອງການ ໄປຈົນເຖິງດູແລເອກະສານ, ກວດສອບ SOP, LOR ແລະ Transcript ໃຫ້ຄົບຖ້ວນ, ດູແລເລື່ອງວີຊານັກສຶກສາ ຢ່າງຮັດກຸມ ແລະ ປະສານງານກັບສະຖາບັນການສຶກສາໃຫ້ນ້ອງໆ ທຸກຂັ້ນຕອນ.

ການມີທີມພີ່ຊ່ວຍດູແລ ແນະນຳການວາງແຜນຈັດລຳດັບຄວາມຄິດໃຫ້ຕັ້ງແຕ່ຕົ້ນ ຈະເຮັດໃຫ້ພາບລວມຂອງການຮຽນຕໍ່ຕ່າງປະເທດຊັດເຈນຂຶ້ນຫຼາຍ ຫຸຼດຄວາມກົດດັນ ແລະ ຍັງຊ່ວຍປະຢັດທັງເວລາ ແລະ ຄ່າໃຊ້ຈ່າຍຮຽນຕໍ່ຕ່າງປະເທດ. ໃນໄລຍະຍາວ ເພາະບາງຄັ້ງການຕັດສິນໃຈຜິດພາດພຽງຄັ້ງດຽວ ອາດເຮັດໃຫ້ເສຍເງິນເພີ່ມໂດຍບໍ່ຈຳເປັນ.

👉 ສອບຖາມ ແລະ ຂໍຄຳປຶກສາຟຣີໄດ້ທີ່ www.i-study.co

📞 ໂທລະສັບ: 099-512-3639

📱LINE: @i-study1

📲FB: istudy.bkk

📸IG: istudyth

ຖ້າຈະສະຫຼຸບທັງໝົດໄວ້ໃນປະໂຫຍກດຽວ ຢາກບອກວ່າ ການກຽມຕົວທີ່ດີ ຄືຈຸດເລີ່ມຕົ້ນຂອງຄວາມສຳເລັດໃນການຮຽນຕໍ່ຕ່າງປະເທດ.

ຖ້າຕອນນີ້ກຳລັງສົນໃຈຮຽນຕໍ່ຕ່າງປະເທດ ແຕ່ຍັງບໍ່ຮູ້ຈະເລີ່ມຢ່າງໃດ ຫຼື ມີແຜນຢູ່ແລ້ວ ແຕ່ຍັງບໍ່ໝັ້ນໃຈວ່າລຳດັບການກຽມໂຕຖືກຫຼືຍັງ i-study ຍິນດີຊ່ວຍດູແລ ແລະ ໃຫ້ຄຳປຶກສາໃນທຸກຂັ້ນຕອນ ຕັ້ງແຕ່ເລືອກທີ່ຮຽນໄປຈົນເຖິງວັນເດີນທາງຈິງ ແລະ ຍັງໃຫ້ບໍລິການຊ່ວຍເຫຼືອນ້ອງໆ ຕະຫຼອດໄລຍະເວລາການຮຽນອີກດ້ວຍ.

ຄຳຖາມທີ່ພົບເລື້ອຍ (FAQ) 

ຄ: ຄວນເລີ່ມກຽມໂຕຮຽນຕໍ່ຕ່າງປະເທດລ່ວງໜ້າດົນປານໃດ?
ຕ: ໂດຍຫຼັກແລ້ວ ແນະນຳໃຫ້ເລີ່ມຢ່າງໜ້ອຍ 6–12 ເດືອນລ່ວງໜ້າ ເພາະຂັ້ນຕອນການຮຽນຕໍ່ຕ່າງປະເທດ ມີຫຼາຍສ່ວນທີ່ໃຊ້ເວລາ ທັງການຫາຂໍ້ມູນ, ເລືອກມະຫາວິທະຍາໄລ, ກຽມເອກະສານ, ສະໝັກຮຽນ ແລະ ຍື່ນວີຊານັກສຶກສາ. ຍິ່ງຖ້າຕ້ອງກຽມພາສາ ແລະ ມີແຜນສອບ IELTS ນຳ ການເລີ່ມໄວຈະຊ່ວຍໃຫ້ບໍ່ກົດດັນເກີນໄປ.

ຄ: ຄະແນນສະເລ່ຍ (GPA) ບໍ່ສູງ ສາມາດໄປຮຽນຕໍ່ຕ່າງປະເທດໄດ້ຫຼືບໍ່?
ຕ: ໄດ້ ການຮຽນຕໍ່ນອກ ບໍ່ໄດ້ວັດພຽງ GPA ຢ່າງດຽວ. ຫຼາຍສະຖາບັນເບິ່ງຫຼາຍຢ່າງປະກອບກັນ ເຊັ່ນ ປະສົບການເຮັດວຽກ, SOP, ຜົນພາສາ ແລະ ຄວາມຊັດເຈນຂອງເປົ້າໝາຍ. ບາງກໍລະນີ ຍັງມີຫຼັກສູດ Foundation, Diploma ຫຼື Pre-Master ເພື່ອຊ່ວຍກຽມຄວາມພ້ອມກ່ອນເຂົ້າຮຽນຫຼັກສູດຫຼັກນຳ.

ຄ: ເປັນຫຍັງຈຶ່ງຄວນປຶກສາເອເຈັນຊີຮຽນຕໍ່ຕ່າງປະເທດຢ່າງ i-study?
ຕ: ພວກເອື້ອຍອ້າຍ ມີຄວາມຮູ້ ແລະ ມີທາງເລືອກຫຼາກຫຼາຍ. ພວກເຮົາໃຫ້ບໍລິການປຶກສາແບບລາຍບຸກຄົນ ເພາະເຂົ້າໃຈວ່າແຕ່ລະຄົນມີຄວາມຕ້ອງການ ແລະ ຂໍ້ຈຳກັດຕ່າງກັນ. ການກຽມຕົວມີລາຍລະອຽດຫຼາຍ ແລະ ມີໂອກາດພາດໄດ້ໃນຫຼາຍຈຸດ ໂດຍສະເພາະເລື່ອງເອກະສານ, ໄທມ໌ລາຍ ແລະ ວີຊານັກຮຽນ. ການມີທີມຊ່ວຍແນະນຳວ່າໂຕໃດຄວນເລີ່ມກ່ອນ ຫຼື ໂຕໃດຍັງຂາດຢູ່ ຈະເຮັດໃຫ້ການຮຽນຕໍ່ຕ່າງປະເທດ ເປັນລະບົບ ແລະ ຫຸຼດຄວາມສ່ຽງຈາກການເສຍເວລາ ເສຍເງິນໂດຍບໍ່ຈຳເປັນ.

ຄ: ພາສາອັງກິດບໍ່ເກ່ງ ຫຼື ຍັງບໍ່ມີຄະແນນ IELTS ສາມາດໄປຮຽນຕໍ່ນອກໄດ້ບໍ່?
ຕ: ໄດ້. ບາງມະຫາວິທະຍາໄລມີຄອດສ໌ພາສາ, ຫຼັກສູດ Pathway ຫຼື ມີກຽມຄວາມພ້ອມກ່ອນເຂົ້າຮຽນຈິງ. ເມື່ອສອບເສັງຜ່ານຕາມເກນ (ສ່ວນຫຼາຍໃຫ້ສອບຜ່ານ 60%) ກໍສາມາດເຂົ້າຮຽນຫຼັກສູດຫຼັກໄດ້ ໂດຍບໍ່ຕ້ອງຍື່ນ IELTS ໃໝ່. ຢ່າງໃດກໍຕາມ ຖ້າມີແຜນຮຽນຕໍ່ຕ່າງປະເທດຢູ່ແລ້ວ ຄວນເລີ່ມວາງແຜນເລື່ອງພາສາໄວທີ່ສຸດ ເພາະການສອບ IELTS ຫຼື ການກຽມຜົນພາສາອື່ນໆ ໃຊ້ເວລາສະເໝີ.

ຄ: ໄປຮຽນຕໍ່ຕ່າງປະເທດ ສາມາດເຮັດວຽກພາທ໌ໄທມ໌ໄປນຳໄດ້ບໍ່?
ຕ: ເກືອບທຸກປະເທດອະນຸຍາດໃຫ້ເຮັດວຽກເສີມພາທ໌ໄທມ໌ລະຫວ່າງຮຽນ (ຍົກເວັ້ນສິງກະໂປ ແລະ ໄທ) ແຕ່ເງື່ອນໄຂຕ່າງກັນໄປຕາມປະເທດ ແລະ ປະເພດວີຊານັກສຶກສາ. ປະເທດທີ່ນິຍົມຢ່າງ ອອສເຕຣເລຍ, ອັງກິດ, ນິວຊີແລນ ແລະ ການາດາ ມັກອະນຸຍາດໃຫ້ເຮັດວຽກພາທ໌ໄທມ໌ໄດ້ຖືກຕ້ອງຕາມກົດໝາຍ ໂດຍສະເລ່ຍປະມານ 10–25 ຊົ່ວໂມງຕໍ່ອາທິດລະຫວ່າງເປີດພາກຮຽນ ແລະ ເຮັດໄດ້ເຕັມເວລາໃນຊ່ວງປິດພາກຮຽນ. ຄວນກວດສອບຂໍ້ມູນລ່າສຸດຈາກແຫຼ່ງທາງການສະເໝີ.

ຄ: ອາຍຸຫຼາຍແລ້ວ ຫຼື ເຮັດວຽກມາຫຼາຍປີ ຍັງສາມາດໄປຮຽນຕໍ່ຕ່າງປະເທດໄດ້ຢູ່ບໍ່?
ຕ: ໄດ້ຢ່າງແນ່ນອນ. ການຮຽນຕໍ່ນອກ ບໍ່ມີຄຳວ່າສາຍເກີນໄປ. ຖ້າເຮົາມີເປົ້າໝາຍຊັດເຈນ ແລະ ອະທິບາຍເຫດຜົນໄດ້ສົມເຫດສົມຜົນ. ຫຼາຍຄົນທີ່ເຮັດວຽກມາຫຼາຍປີ ຍິ່ງມີຈຸດເດັ່ນ ເພາະຮູ້ວ່າຕົນເອງຢາກຮຽນຫຍັງ ແລະ ຈະນຳຄວາມຮູ້ນັ້ນໄປຕໍ່ຍອດແນວໃດ ສິ່ງສຳຄັນຄືວາງແຜນໃຫ້ດີ ແລະ ກຽມ SOP ທີ່ສອດຄ່ອງກັບເປົ້າໝາຍຂອງຕົນເອງ.

ບົດຄວາມໂດຍ i-study | www.i-study.co